sexta-feira, 15 de dezembro de 2017

A VOZ DAS EX-

Continúa o Club d@s Ex- a traernos propostas lectoras ben suxestivas e complementarias das anteriores.

Neste caso chega a quenda de Ana Seoane, que pasou de ser exalumna a se converter xa en profesora!!!!

Benvida sempre ao noso planeta lector, Ana!!!

E que nos propón ler? Pois, olliño que velaquí chega...




Todo OK, de Diego Ameixeiras


A través deste libro Diego Ameixeiras expón a vida da protagonista, Inés Landeira. Esta muller estaba a piques de ser xulgada por un delito de narcotráfico que a levou a un tráxico final, tanto a ela como á súa amiga da infancia María. 
Inés buscaba a absolución por un delito que, segundo ela, non cometeu e que impregnou a moita xente; o submarino cargado de droga procedente de Colombia revolucionou tanto a policía como aos que estaban implicados no delito.

Durante o transcurso da novela, Inés vive diferentes situacións, a doenza dunha perna que case non a deixa camiñar, a morte de súa nai, o encarceramento de Jairo, o noivo da súa mellor amiga, e a traizón do tenente Gutiérrez que xoga a varias bandas durante toda a novela.  

É unha novela moi cortiña, de fácil lectura pero con moito contido e moita información que hai que ir asimilando mentres se le para poder comprender a historia completa. 

Recomendada 100%

terça-feira, 28 de novembro de 2017

UN CLUB A MEDRAR...

Xa estamos funcionando a pleno rendemento, mais tiñamos unha débeda pendente: presentar o noso club de lectura ao alumnado que se acaba de estrear no centro en 1º ESO.

Por fin chegou ese día de facermos as presentacións e podemos verificar que a recepción foi do máis positiva.

Estamos seguras de que en breve un novo equipo lector dará moito que falar en Coristranca e que ler...

De quen será o mérito principal? Pois de Carla, Uxía, María e Aarón, expertos lectores de 4º ESO.


quarta-feira, 22 de novembro de 2017

CORISTRANCA NAS ONDAS


Este martes 21 de novembro inauguramos unha nova tempada radiofónica en Radio CUAC FM para falar de libros e lectura, dentro do programa "A fume de carozo", promovido polo Equipo de Dinamización da Lingua Galega do Colexio Calasanz (PP. Escolapios) da Coruña.

Moitas páxinas de contidos e seccións literarias. Non imos desvelar moito para quen non nos puido escoitar ao vivo e está a agardar polo enlace on line, así que só vos adiantamos algúns nomes que no programa soaron: María Reimóndez, Antonio García Teijeiro, María Solar, Jordi Sierra i Fabra...

Atención, atención, radiooíntes... se non nos escoitastes ao vivo, deixámosvos por aquí o enlace ao programa para que recunquedes na escoita deste fabuloso programa guionizado e locutado por María, Carla e Uxía!!!

MÁIS NOVAS DESDE O CLUB D@S EX-


Seguimos a recibir propostas lectoras do Club d@s Ex- con esta nova reseña de María Rodríguez sobre unha novela que nunca nos deixa sen o necesario pouso reflexivo, sempre e cada día do ano, máis aínda nestas vésperas dun novo 25 de novembro, Día Internacional Contra a Violencia de Xénero.

Grazas, María, por partillares a túa lectura e valoración crítica sobre A cabeza de Medusa, de Marilar Aleixandre.

A Cabeza de Medusa é un libro incrible, que todo o mundo debería ler, pero sobre todo, os adolescentes.
Nestes momentos, como todos sabemos, as rapazas estamos máis expostas que os rapaces a que nos suceda calquera cousa se camiñamos soas pola rúa un día pola noite; pode ser que nos rouben, que nos violen, e incluso que nos maten, e como non, a culpa sempre recaerá sobre nós. Cuestionarase como iamos vestidas, que faciamos a esa hora SOAS pola rúa, por que non nos acompaña un amigo... e neste libro sucede algo así.
Unha noite na que dúas amigas saen de festa e que podía ser estupenda, remata con dúas violacións. As rapazas violadas, Sofía e Lupe, atrévense a denunciar o sucedido, pero a presión social, o mal compañeirismo e a preocupación polo 'que dirán' provocan que se sintan culpables e unha delas acabe retirando a denuncia.
Nesta lectura atopámonos con todo tipo de persoas, pero, como case sempre, aparecerá alguén que evite que non penses no sucedido e que, pouco a pouco, volvas á túa vida normal sen que ninguén te xulgue e que, se o fan, non che afecte o máis mínimo.

Agardo que desfrutedes da lectura igual, ou incluso máis, ca min e que sigades lendo moito tempo máis, porque os libros son vida.
 


sábado, 18 de novembro de 2017

E QUE CONTAN POLO CLUB D@S EX-?


Desta volta é a nosa excompañeira do club Patricia Bardanca quen volve onda nós para compartir o seu novo percorrido lector.

Lourenço Xograr é o título da novela de Manuel Portas que ela nos recomenda con esta ben suxestiva reseña.

Moitas grazas, Patri!!!


A última lectura que fixen foi a de Lourenço Xograr, unha historia ambientada no século XIII, na Idade Media, que nos transporta a outra sociedade, a  outros pensamentos e á nosa lírica medieval. Poderemos contemplar esta época vista dende diferentes perspectivas.

 Lourenço é o gran protagonista desta novela, na que haberá múltiples aportacións históricas e políticas reais desa mesma época. 

A novela divídese en dúas partes, a primeira cun narrador omnisciente que narra a vida de Lourenço e a segunda con diferentes narradores, todos personaxes da novela, que nos irán contando a historia dende a súa perspectiva. Nalgún caso mesmo farán denuncias sociais, como consecuencia de numerosos comportamentos que se daban. 

Recomendo esta lectura porque nos traslada a unha historia ficticia dunha época pasada da nosa Galicia, pero con intervención de personaxes que si existiron, como María a Balteira, e con acontecementos históricos e políticos que tamén foron reais. Unha historia na que comprenderemos moitos pensamentos e situacións que se viviron anteriormente e que a miúdo nos custa crer.

sexta-feira, 17 de novembro de 2017

NOVA TEMPADA TERTULIANA


O tempo de outono semella que non quere chegar, mais o das tertulias non o deixamos escapar. Así que aquí estamos de novo a voltas coas nosas lecturas.

Nesta ocasión inauguramos o equipo de 3º e 4º de ESO con dúas novelas de María Reimóndez, A dúbida e Corredora.

Non sabemos cal das dúas vos recomendar en primeiro lugar porque non somos quen de escoller nin de prescindir de ningunha!!!



Se cadra imos deixándovos por aquí nos próximos días algunhas ideas e pistas para que vaiades creando opinión e vos lancedes ao mergullo destas páxinas que non vos deixarán indiferentes.

domingo, 12 de novembro de 2017

VOLVE O CLUB D@S EX-


Xa nos tardaban as colaboracións do noso ilustrísimo Club d@s Ex, mais comezan a petar na porta e abrímoslla inmediatamente para saber que andan a ler e que pistas nos deixan por aquí.

Este curso inaugura a rolda de intercambio literario Antía Varela que por primeira vez en varios cursos xa non nos acompaña nas aulas, nin nas tertulias nin nas actividades extra... E canto a estrañamos!!!!

Menos mal que  non perde ocasión de compartir connosco a súa última lectura, O lapis do carpinteiro, de Manuel Rivas. A ver quen é a próxima en lelo?


Teño que dicir que me pareceu unha lectura bastante difícil, tiven que volver atrás moitas veces porque me perdía continuamente, xa que consta de varios enfoques diferentes que se producen de forma brusca.

Son consciente de que se me escaparon moitos detalles importantes e de que, por suposto, precisa unha segunda lectura que pronto será realizada.

Esta novela trata sobre a estancia do doutor Daniel Da Barca no cárcere de Santiago de Compostela. A historia é contada maioritariamente por Herbal, un dos gardas, a sombra do doutor durante o tempo que estivo encadeado, mesmo foi con el a todos os sitios aos que o trasladaron.

Estes dous personaxes, tan diferentes entre eles, estaban unidos polo amor que sentian cara Marisa Mallo, a parella do médico. A historia entre Da Barca e Marisa deixa claro que o amor non entende de fronteiras, mantiveron a súa relación a pesar de todas as dificultades que se lles presentaron.

Non vou destacar moito máis desta primeira lectura pero preciso rematar esta reseña nomeando a frase que máis me marcou do libro; o momento no que a un inspector lle cae a pistola da funda e o doutor di: "Caeulle o corazón ao chan, colega."

sábado, 14 de outubro de 2017

CHAMANDO Á TERRA...

Recibimos unha chamada inesperada este sábado 14 de outubro e atendémola de moi bo agrado.

Quen estaba ao outro lado dos fíos? Nin máis nin menos que a escritora e locutora principal María Solar, coordinadora do programa da Radio Galega "Chamando á Terra".

E contamos parte do noso proxecto lector e adiantamos algunha das novidades para este curso.

Que queredes saber máis? Pois afinade o ouvido que por aquí queda!!!



segunda-feira, 18 de setembro de 2017

COMEZA UNHA NOVA VIAXE LECTORA



Así rematamos o curso pasado o mural da nosa viaxe literaria ao longo dos meses. 

De volta do verán chegou a hora de reiniciarmos unha nova viaxe aventureira a través de novas páxinas.

Quen se apunta? Hai alguén aí?


sábado, 1 de julho de 2017

PECHAMOS O LIBRO DO CURSO

Chegamos á fin de curso e temos que pechar o libro da  nosa memoria lectora.

Foi un pracer e un orgullo compartir lecturas cun equipo humano tan grande.

Vémonos o vindeiro curso, seguro que con máis caras novas conquistadas, mais tamén estrañaremos todas as que marchades para seguir o voso camiño formativo noutros centros. Gardámosvos un sitio sempre para compartir vida e amizade entre liñas e desde xa sodes moi benvidas ao noso estimadísimo Club d@s Ex-!!!

Bo verán, tamén lector!


quinta-feira, 22 de junho de 2017

VIDEOBOOK

Xa se coñece a proposta videoliteraria gañadora do concurso RETO LECTOR! que a Editorial Galaxia puxo en marcha hai uns meses.

Mirade que fermosura de convite lector para esta obra que moito nos sorprendeu entre as nosas lecturas este curso: O neno inverno, de María Canosa, autora coa que tivemos a fortuna de conversar na nosa biblioteca.


E sempre que hai gañadora, tamén hai finalistas, así que ollade por aquí estoutras propostas que nos poden dar pistas para as lecturas deste verán.

terça-feira, 20 de junho de 2017

#Xclubsdelecturagal

Este sábado 17 de xuño unha parte do noso club de lectura participou en Compostela na xornada formativa dos clubs de lectura que se converteu tamén nunha auténtica festa de celebración do traballo que, sobre o libro e a lectura, desenvolvemos ao longo de todo o ano.



O noso club estivo representado polas alumnas Uxía, Carla, Victoria e as dúas María, ademais das profesoras Pilar e Mercedes.

E non pensedes que fomos a Compostela pasar un día de calor insoportábel, non. Fomos descubrir que hai un mundo de xente que está interesada na  lectura coma nós, coa que podemos dialogar sobre o que lemos e coa que podemos ampliar curiosidades, experiencias e ilusións.

E reencontrarnos coa nosa escritora admirada, Ledicia Costas. Todo un luxazo!!!




En breve poderedes acceder ao vídeo que expresará en imaxes tantas emocións, sorrisos, conversas e sorpresas alí vividas durante un sábado intenso, mesmo algo somerxidas...



Mais polo de agora algunha imaxe que vos dará que pensar sobre o protagonismo que as nosas Coristrancas por alí tiveron diante dun auditorio de máis de 1.000 persoas.




sexta-feira, 2 de junho de 2017

ENCONTRO CON MARÍA SOLAR


Pechamos o ciclo de encontros deste curso escolar as seccións de 3º e 4º ESO coa visita dunha autora que agardabamos con impaciencia: María Solar.


Os nenos da varíola e As horas roubadas ocuparon as nosas lecturas e os nosos faladoiros previos nas seccións de 3º e 4º ESO. 

Souberamos algo máis da intrahistoria da novela As horas roubadas grazas á recente entrevista radiofónica do noso último programa "A fume de carozo". 


Agora cumpría avanzar algo máis neste relato dun tempo difícil para a liberdade das mulleres e mergullarnos no pouso histórico e científico d´Os nenos da varíola, que nos trouxo unha inesperada descuberta da man da súa autora: un dos nenos protagonistas da expedición de Balmis era de Coristanco!!!! Quen o podería supoñer?


Grazas sempre, María, por vires encontrarte connosco da man da túa escrita compañeira!

terça-feira, 23 de maio de 2017

PECHE TEMPADA RADIOFÓNICA


Hoxe o noso equipo de radio pechou a tempada nas ondas emitindo o derradeiro programa. Derradeiro? Si, o derradeiro, porque tanto María como Lucía e Patricia abandónannos neste curso para seguir o seu tempo de formación noutro centro.

Moito as imos estrañar, mais a tarde de hoxe foi moi especial. E se non nos credes... será porque non as escoitastes ao vivo, así que atención, atención ao programa que xa chega desde aquí ás súas pantallas!!!

Impresionantes entrevistas ás grandes descubertas literarias deste último trimestre: o escritor Carlos Negro e a escritora María Solar.

De vós non as deixariamos perder!!!



Parabéns, locutoras superlectoras!

segunda-feira, 8 de maio de 2017

TERTULIA CON MARÍA CANOSA

O equipo lector de 1º e 2º ESO recuperamos as tertulias literarias e nesta ocasión contamos cunha convidada de luxo, a escritora ceense María Canosa, a autora da nosa última lectura, O neno inverno, quen nos descubriu algunhas das razóns que a levaron a escribir este libro, así como cales son as pautas do seu proceso creativo e o camiño da escrita desde o momento en que se idea unha historia que é preciso contar até que se chega a ver publicada en formato libro.



Toda unha descuberta para esta tarde de comezo de semana do mes das letras galegas.



Moitísimas grazas, María, por nos acompañares hoxe. Agardámoste na vindeira lectura e nunha próxima visita!

terça-feira, 2 de maio de 2017

INTERCAMBIO LECTOR CO IES OTERO PEDRAYO

Seguro que gardamos centos de imaxes para a lembranza do intercambio partillado co IES Otero Pedrayo da Coruña, mais faltaba a nosa síntese grazas ao traballo da compañeira Pilar Espido.

Está claro que o pasamos tan ben que nos veremos na obriga de repetir... ou non?

Grazas a todas e cada unha das persoas que o fixestes posíbel!!!




terça-feira, 25 de abril de 2017

PALABRAS EN VERSO


Que é a poesía? É iso que contan por aí? Só fala a poesía diso que se di? E se por acaso non rima?



Tópicos, preguntas, diálogo, sensacións, sorpresas doces, respostas e sobre todo versos e poemas foi o que hoxe nos trouxo ao noso club de 4º ESO o poeta Carlos Negro.




Sen dúbida, todos os interrogantes xurdidos coa lectura de Penúltimas tendencias e Masculino singular ficaron resoltos... ou levaron a novos interrogantes? Que vos parece: Lucía (s), Bianca, Patricia(s), Iago, Cristina, Antía, Esperanza e Maria?


segunda-feira, 27 de março de 2017

FOTOHAIKUS DE PRIMAVERA (IX)

Patricia Pose preséntanos, unha semana máis, o seu fotohaiku de primavera...

 A filla do Mar
só na mente pervive
quixo ser libre


sexta-feira, 24 de março de 2017

DE QUEDADA EN QUEDADA

Continuamos coas nosas quedadas literarias tamén na sección do club de 4º ESO para un novo intercambio literario.

Despedimos a lectura dunha novela para nós moi diferente e novidosa na nosa traxectoria lectora como é Negruña, de Xosé Duncan e saudamos a chegada da poesía da man de Carlos Negro, autor de Penúltimas tendencias e Masculino singular.

Manterémosvos ben informados, non vos despistedes!!!


quinta-feira, 23 de março de 2017

NOVA TERTULIA LITERARIA

A sección do club de lectura de 3º ESO puxo fin, cunha nova quedada literaria, ao tempo de lectura da novela de Francisco Castro, Tes ata as dez

Lembrade que tedes ao voso dispor o enlace á gravación do noso último programa de radio "A fume de carozo", onde compartimos co autor unha estupenda e ben completa entrevista.


FOTOHAIHUS DE PRIMAVERA (VIII)

Iago Caamaño achéganos unha outra perspectiva en palabras e imaxe poética...

Chuvias de maio,
unha noite, furtiva,
lúa nos pinos.


terça-feira, 21 de março de 2017

FOTOHAIKUS DE PRIMAVERA (VII)

Toma a palabra Carmen Antelo... que vos parece?


A primavera
Os paxaros felices 
A Luz do día 


FOTOHAIKUS DE PRIMAVERA (VI)

Ylenia Calvo recibe deste xeito o Día Internacional da Poesía...

As margaridas
comezan a florecer
a primavera!!
 
 
 
 

segunda-feira, 20 de março de 2017

FOTOHAIKUS DE PRIMAVERA (V)

E Cristina Pallas pensou a primavera en equipo...


É primavera
e todos disfrutamos
do cálido sol. 


domingo, 19 de março de 2017

FOTOHAIKUS DE PRIMAVERA (IV)


Lucía Vázquez achéganos a súa ollada primaveral a través deste fotohaiku persoal...

 
Xa aquí de novo
comeza a primavera,
o tempo voa.
 
 

FOTOHAIKUS DE PRIMAVERA (III)

Bianca García tamén quere deixar por aquí o seu testemuño poético-fotográfico...



Podes escoitar
os paxariños cantar,
as flores nacer. 



segunda-feira, 13 de março de 2017

FOTOHAIKUS DE PRIMAVERA (II)

Patricia Villar continúa a plasmar esta proposta fotopoética primaveral...


Doce flor de abril
mala benvida será
se non asoma.


domingo, 12 de março de 2017

FOTOHAIKUS DE PRIMAVERA (I)

Esperanza Muñiz abre a porta aos vosos fotohaikus de primavera. Marabillosa inauguración!!!

Estomballada
na mol alfombra verde,
doce sospiro.


sábado, 25 de fevereiro de 2017

CHEGA UNHA NOVA EDICIÓN BOOKTUBER

Bianca, María, Patricia e Lucía ofrécennos unha nova entrega da nosa serie booktuber como peche da lectura desta novela que tanto prendeu nelas, como en todo o noso club de lectura.

Con todas vós, Futuro imperfecto de Xulia Alonso.


sexta-feira, 24 de fevereiro de 2017

CORISTRANCA VOLVE A RADIO CUAC FM

Este martes 21 de febreiro o equipo de radio da sección do club de lectura de 3º ESO volveu vibrar nas ondas na emisora de Radio CUAC FM.



Moit@s de vós escoitastes o resultado do seu traballo de guionización ao vivo, entre as 17 e as 18 horas, mais imos deixarvos aquí o enlace para a súa escoita on line para que non perdades ningún dos interesantes contidos que neste programa descubrimos.



Que queredes algunha pista? Pois... por exemplo unha magnífica e completa entrevista ao escritor Francisco Castro, un saúdo de presentación á nova académica, a escritora Marilar Aleixandre, unha lembranza da xornada do venres 24 de febreiro, identificado como Día de Rosalía, neste seu 180 aniversario e unha sorpresa musical inesperada a cargo das propias locutoras, Carla e María...

A vosa curiosidade xa non agarda máis, non si?

Entrade xa no enlace aquí agochado!!!

quinta-feira, 23 de fevereiro de 2017

24 DE FEBREIRO, DÍA DE ROSALÍA


CARTAS DE INVERNO



Con estas caras de satisfacción comentamos esta nova lectura de Agustín Fernández Paz na sección do club de lectura de 2º.

As súas Cartas de inverno serviron para nos intrigaren ou incluso para pórnos medo pola noite.

E despois da tertulia e de moito pensar e repensar para decidir cal sería o próximo título, por primeira vez, a falta de un, escollemos dous que xa agora vos adiantamos vos se queredes ir lendo á par nosa: A casa do medo, de Agustín Fernández Paz e A illa de todas as illas, de Xabier P. Docampo.

Xa vos contaremos que dá de si esta nova experiencia lectora compartida...

sábado, 18 de fevereiro de 2017

ENCONTRO CON XULIA ALONSO


A sección do club de 4ºESO celebramos o 14 de febreiro dun xeito especial e inolvidábel.

A visita de Xulia Alonso, autora de Futuro imperfecto, ampliou o horizonte das nosas lecturas e da nosa tertulia previa para coñecer os tempos, a secuencia do proceso da súa escrita e a experiencia vivida após a publicación.


E Esperanza agasallounos cunha sorpresa que non esqueceremos nunca e coa que moito imos campar todo o equipo.



Agradecidas ás dúas por unha tarde compartida xa para sempre!